"Gazteok aldaketaren parte gara" - Maialen Olabe Aguirre

Bizkaian, asko gara gizarte hobearen alde parte hartzen eta lan egiten ari garen gazteak. Askotan entzun dugu gazteok ez dugula parte hartzen. Horregatik, beharrezkoa iruditzen zaigu gizarteak ulertzea gure parte hartzeko moduak aldatu egin direla.

Parte-hartzearen barruan, asoziazionismoaren eredu tradizionalaren aldeko apustua egiten jarraitzen duten gazte asko aurki ditzakegu. Eredu hori bereziki indartu da pandemian, gazte asko erakundeetara hurbildu baitira boluntario gisa parte hartu ahal izateko. Ekintza zehatzekin konprometitzen diren beste asko ere aurkitzen ditugu; izan ere, une jakin batzuetan parte hartzea erabakitzen dute, eta bertan uzten dute beren harri-koskorra. Hori oso lotuta dago gure gizarte-testuinguruarekin, mugikortasun geografiko handia baitugu, eta horrek denbora luzean leku berean ez egotera garamatza, eta gure ohituretan aldaketak eragiten ditu. Gainera, sare sozialen presentziak beste komunitate mota batzuk sortu ditu, non komunikatzeko eta konprometitzeko modua beste modu batean egiten den.

Alde horretatik, asko dira gaur egun Bizkaian identifikatzen ditugun erronkak. Lehenik eta behin, kirola gazteok ia modu naturalean parte hartzen dugun gunea dela esan dezakegu, gero eta integratuago baitago gure bizi-ereduan. Gazte askok konpromiso aktiboa dugu eta gogor lan egiten dugu kirol eredu konprometitu, askotariko eta laguntasuna nagusi den eredu baten alde.

Krisi klimatikoa, ingurumena eta kontsumo-ereduak gazteok identifikatzen ditugun erronka handien artean daudela esan genezake. Horregatik, parte-hartzea oso zabala da urtean zehar egiten diren proiektu, ekintza eta ekimenetan. Konpromiso hori ez da geratzen urtean zehar egiten diren ekintzetan, gure egunerokoan ezartzen ari garen ohitura-aldaketetan baizik.

Gazteek kulturaren arloan duten parte-hartzea ere kontuan hartu beharreko gauza interesgarria da. Kultura osatzen duten pertsona gazte asko aurkitzen ditugu, bai musika taldeen bidez, bai antzerki bidez, dantza egiten dutenak... Parte hartzeko modu asko daude, eta argi dago Bizkaian, batez ere kultur sarean, gazteen presentzia oso zabala dela oraindik. Hala ere, beharrezkoa ikusten dugu kulturaren kontsumo-ereduak aztertzea, teknologiaren eta plataforma digital berrien ondorioz ez baitugu modu berean kontsumitzen. Horrek ez du eragin gazteok kulturaren parte izateari uztea; izan ere, askoz gehiago kontsumitzen dugu, kontsumitzeko erabiltzen ditugun tresnak aldatu dira eta hori da kontuan hartu behar dena.

Gazteek Bizkaia aktibatzeko duten zeregina oso garrantzitsua da, kontuan hartuta ez garela etorkizuna bakarrik, oraina ere bagara. Gizarte honekin konpromisoa hartu behar dugu, gure lekutik batzen jarraitu behar dugu, aletxoak ematen jarraitu behar dugu, gizarte bidezkoago, eskuragarriago eta aukera-berdintasunean aberatsago baten aldeko aldaketaren parte izateko.

Maialen Olabe Aguirre

Euskadiko Gaztediaren Kontseiluko (EGK) Presidentea