Adrián Stratta & Marcelo Missón

Beharrezkoa da heztea

Adrian eta Marcelo gara, Bilboko "La Trucco" interpretazio estudio baten sortzaile eta zuzendariak. Bertan, adin eta maila guztietako aktoreak prestatzen ditugu. Duela 5 urte bizi gara Bilbon, eta gure helburua da aukerak ematea prestakuntza integral baten bidez, giza balioari lehentasuna emanez eta gure komunitate artistikoko kide direnen sormen-prozesuei lagunduz.

Duela urte batzuk Buenos Airesen, Argentinan, "Nueva Encuentro" izeneko elkarte sozial batek deitu gintuen baliabide gutxiko auzoetan (gaizki deitutako “villas miserias") kultur jarduerak egiten laguntzeko.

Boluntariotza lana 3-11 urte bitarteko haurren alfabetatzea zen, eta antzerki-eskolak ere ematen genituen kultura-programa batekin batera. Lanaldietan, zeregin horiez gain, otorduak ere ematen ziren (gosaria eta hamaiketakoa), eta haur eta ama gehienak jarduera horiei esker elikagaiak eskuratu ahal zituzten.

Guretzat esperientzia argigarria izan zen. Antzerki-jokoetan mota guztietako indarkeriaz betetako egoerak agertzen ziren, eta haurrek adierazten zituztenetan garrantzi handiagoa hartzen zuten. Harrigarria zen haur horiek nolako naturaltasunez heltzen zioten indarkeria horri, haien egunerokotasunaren parte baitzen. Oso motibagarria izan zen astean ordu batzuetan espazio bat eskaintzea haiek beste errealitate batekin konektatu ahal izateko eta beren adinean hain beharrezkoa den jokoari berriro ekiteko. Egunerokotasunak asko irakatsi zigun eta, zalantzarik gabe, ikasi dugu ziurtzat jotzen ditugun gauzarik oinarrizkoenak ez direla guztion errealitatean ematen, eta horrek areagotu egin zuen horrelako jarduerekiko konpromisoa.

Gure presenteak beste modu batean interpelatzen gaitu, baina gure aurreko boluntariotzaren dinamikak gauza bera adierazten digu: beharrezkoa da heztea. Hona iritsi ginenetik, egoera asko bizi izan ditugu "etorkinak" izateagatik, eta gustatuko litzaiguke kolektiboak, enpresak, erakundeak, fundazioak eta abar horretarako begiradaren bidez heztea.

Penagarria da, baina askotan bigarren mailan geratzen da egiten duguna, migrazioa baita protagonista. "Zuek badakizue etorkinak zaretela" edo "Etorkin gisa imajinatzen dut..." bezalako esaldiak uste baino ohikoagoak dira, baina horrek ez du esan nahi normalizatzea ondo dagoenik, edozein bizipenen aurrean, etorkinak baino lehen, pertsonak garelako.
Lan asko dago egiteko eta bide horri ekiteko proposamen bat prestatzen ari gara.