Laura Marchante Lersundi

Konpontzea ekintza iraultzailea da

Duela hilabete batzuk, Sarean-eko kideekin batera, Repair Cafe-ren nodo berri bat jarri nuen martxan Bilboko San Frantzisko auzoan. Repair Cafe 2009an sortu zen, Amsterdamen, eta gaur egun mundu osoko taldeak biltzen ditu. Helburua erreparazioa sustatzea da, erosi-bota-erosin oinarritutako egungo kulturaren alternatiba gisa.

Hilean behin, larunbatetan, Sarean gune komunitarioan elkartzen gara, gure objektu kaltetuak konpontzeko topaleku bat sortzeko eta, gainera, bertaratzen garen pertsona guztien artean izan ditzakegun laguntza eta ezagutzekin nola egin ikasteko. Erreparazioan partaide izatea funtsezko alderdia da, trebetasun berriak eskuratzean, autosufiziente sentitzean eta gure objektuak konpontzeko gai izatean ahalduntzen gaituen ekintza baita.

Gaur arte, zisterna bat, lanpara bat edo praka apurtu bat ere konpondu ditugu, pertsona bakoitzak topaketa bakoitzera eraman ditzakeen trebetasunak edo beharrak bateratzeari esker. Konponketa bakoitza erabateko gogobetetzea da: objektua ikuskatzen den unetik, duen akatsa zein den ikertu, konponbideak probatu eta, jakina, testa egiteko unea, eta lehen konponbiderik ez zuela zirudienak orain ondo funtzionatzen duela ikustea. Askotan, gauzarik bitxiena da konturatzea objektu horrek zuen akatsa oso txikia zela, oso erraza zela konpontzea, baina gure bizitza bizkor eta hiperkontsumistak eman ez dizkigun trebetasunak eta tresnak besterik ez zitzaizkigula falta.

Ikaskuntza horiez gain, Repair Cafe-ren funtsezko beste faktore bat sortzen den gizarte-elkargunea da, belaunaldien arteko elkarbizitzarako lekua, elkar ezagutzeko, harremanak izateko eta gizarteratzeko. Oso polita da, halaber, lanbide eta jakintza tradizionalak dituzten pertsonei balioa ematea, askotan gutxietsi egiten baitituzte, eta beren komunitateari eman diezaioketen laguntza handia sentitzen baitute.

Repair Cafe-ren barruan boluntario gisa egiten ditudan zereginak topaketen koordinazioa eta aldez aurreko antolaketaz gain, lagundu ahal ditudan konponketetarako nire joste-trebetasunak partekatzeraino doaz :)

Espero dut apurka-apurka handiagoa eta sendoagoa izatea konponketan interesa duen komunitate hau, ekintza iraultzailea den aldetik, bizi garen kontsumo neurrigabearen logikaren aurka gaudelako.

Izena: Laura Marchante Lersundi

Adina: 32 urte

Udalerria: Bilbo