Bizkaia solidarioago baten aldeko konexio interesgarriak

Urdaneta Bizkaiko ikastetxeak 2009az geroztik parte hartzen du Bizkaiko Elikagaien Bankuarekin elkarlanean egiten dituen jardueretan. Barne mailako elikagai bilketekin hasi ziren, baina geroago supermerkatu kanpainetan parte hartzeko proposamena onartu zuten. "Supermerkatuetan bilketa kanpainak egiten direnean zer egiten den ikustea falta zitzaigun; horregatik, interesgarria iruditu zitzaigun gure ikasleak Elikagaien Bankuko biltegietara joatea elikagaien hautaketan eta ordenazioan laguntzeko", azaldu du BizkaiaGara-rako Ignacio Rubio Urdaneta ikastetxeko irakasle eta Pastoral eta Balio Saileko kideak.

Izan ere, ikastetxe horretatik, 2022-2023 ikasturte honetan, boluntariotza-talde bat sortu da Batxilergoko 1. mailako ikasleekin. "Urdanetak egiten duen boluntariotza ekarpen bikaina da gure jarduerarentzat, eta, horregatik, oso eskertuta gaude gizartearekin boluntariotzan hartutako konpromisoagatik eta, zehazki, elikagaiak biltzeko kanpaina honetan emandako laguntzagatik", azaldu dute Bizkaiko Elikagaien Bankuko bilketa-taldetik.

"Joan den urtearen amaieran Basaurira joan ginen, Elikagaien Bankuak bere biltegi zentralak dituen lekura, eta azaroan egin zen Bilketa Handiaren kanpainan emandako elikagaiak aukeratzen lagundu genuen. Ikastetxeko boluntario bakoitzak, uhal garraiatzaile baten inguruan jarrita, zegozkion elikagaiak kentzen zituen", Ignacio Rubiok dioenez.

Urdaneta ikastetxeak urtean hiru ekintza egiten ditu Bizkaiko Elikagaien Bankuaren alde:

- Garizuma-garaian, elikagaien bilketa egiten da ikasleen familien eta ikastetxeko langileen artean. "Urtero 3 tona inguru biltzen ditugu. Kanpainarako poltsa berezi batzuk ere diseinatu ditugu, birziklatuta eta ikastetxeko, Elikagaien Bankuko eta 2030 Agendako logoekin".

- Ikastetxeko jaietan, cross solidario bat antolatzen da, eta bertan parte hartzen duten ehunka pertsonei eskatzen zaie borondatez elikagaiak emateko dortsalak biltzen dituztenean.

- Bizkaiko supermerkatuetan egiten diren elikagai-kanpainetan ere parte hartzen dute. Azken edizioan, Getxo, Berango, Erandio eta Bilboko supermerkatu batzuetaz arduratu ziren.

Covadonga boluntario gisa ekimenean parte hartu zuten ikasleetako bat izan zen: "Zalantzarik gabe, jarduera honek dohaintzaren garrantzia erakutsi digu, izan ere, jende askok, pertsonek emandako elikagairik gabe, arazo asko izango lituzke eguneroko bizitzan. Gainera, han zeuden pertsonek taldean lan egiten eta gure artean koordinatzen irakatsi ziguten, dena hobeto atera zedin eta inor ez zedin geratu kolaboratu gabe. Horrelako ekimenei esker, balio garrantzitsuenetako baten, elkartasunaren, garrantzia ikas dezakegu. Gainera, kontziente gara ekintza horiekin gizarte hobea eta bidezkoagoa sortzen laguntzen dugula, mundu guztiak modu duinean bizitzeko aukera izan dezan".

Biltegiko elikagaien aukeraketan parte hartu izanak agerian utzi die biltzen den janari kopuru handia, hau da, milaka pertsonaren parte-hartzeak, bakoitzak bere ekarpenarekin, zenbateko handia egiten duela egiaztatzea. Bestalde, Bizkaiko familia askok bizi duten egoera ulertzeko ere balio izan die; izan ere, Elikagaien Bankura eta erakundeetara jo behar dute janaria lortzeko. Rubiok azaldu du esperientzia horiek zer ekarpen egiten dieten ikasleei.

Konexioak. Loturak. Red. Ekosistema. BizkaiaGara bitartekari izanik Bizkaia bidezkoagoa, ekitatiboagoa, eskuzabalagoa eta solidarioagoa lortzeko hezkuntza-eremuan parte hartzeko ekintzaren adibide argia da hau.