Zure erakundetik agenda publiko eta politikoan eragina izango duen estrategia diseinatzeko, garrantzitsua da hausnarketa sakon batetik abiatzea: Zertarako egiten duzu, zergatik eta nori interesatzen zaio?
1. Zehaztu eragin nahi duzun aldaketa. Argitu zein aldaketa sozial edo politiko bultzatu nahi duzun. Identifikatu ikusgai egin edo konpondu nahi duzun arazoa eta ezarri helburu zehatzak zure helburura hurbiltzeko.
2. Konektatu testuinguru sozialarekin. Herritarrak gero eta nekatuago daude sozialki eta urrunago sentitzen dira politikatik. Horregatik, estrategiak hurbilena, egunerokoa eta emozionala izan behar du ardatz. Mikroekintzek eragin handia izan dezakete pertsonen eta haien errealitateekin konektatzen dutenean.
3. Entzun eta parte hartu. Jendeak entzuna izan nahi du eta erabakietan parte sentitu. Entzute aktiboko eta elkarrizketarako kanalak ezartzea funtsezkoa da enpatia eta zilegitasuna sortzeko. Erantzukizunak hartzeko prestutasuna erakusteak aldea egin dezake.
4. Aztertu eta ikertu. Sakon ikertu eragin nahi duzun gaia. Bilatu datuak, txostenak eta antzeko esperientziak. Ezagutu:
o Agenda soziala (zer kezkatzen du herritarrak),
o Agenda politikoa (zein gai lehenesten dituzte alderdiek),
o Agenda mediatikoa (zein gai daude komunikabide eta sareetan),
o Arau-esparrua (indarrean dauden legeak eta eztabaidan daudenak),
o Eta eskumenen esparrua (nork erabakitzen duen gai horren inguruan eta zer botere mailarekin).
5. Proposamen esanguratsuak landu. Ekarri irtenbideak, ez soilik kritikak. Komunikatu argi, eguneratutako hizkuntza erabiliz eta emozionalki konektatzen duten narratibekin. Sortu ezagutza, partekatu eta zure erakundea aktore serio eta proposatzaile gisa kokatu.
6. Pentsatu zure jomugan dagoen publikoan. Identifikatu eragile gakoak: erabaki politikoak hartzen dituztenak, komunikabideak, adituak, eragindako pertsonak eta aliatu posibleak. Aliantza estrategikoak ezarri zure eragina handitzeko eta sor daitezkeen erresistentziak aurreikusi.
Laburbilduz, eragin estrategiak jakintza sakona, lotura emozionala, aliantza estrategikoak eta proposamen bideragarriak uztartzen ditu. Konkretutik abiatuz, eraldaketara iristeko bidea egiten da.
Herritarren parte-hartzea modu eraginkorrean bultzatzeko Silvan eta Miracle aholkularitzaren Eva Silvánen proposamena irakurri nahi baduzu, klikatu hemen.